滿城盡帶黃金甲

考完試同屋企人睇呢隻碟，其實都無話抱好大寄望會好睇，始終得奬戲未必好睇，果然，套戲睇到我媽媽訓著覺，我都係睇d唔睇d，睇睇下又走去做其他野，因為就算做完其他野番轉頭都唔會miss左劇情。套戲直到臨尾先最緊張好睇，即周杰倫帶兵叛變個度開始，即重陽個晚先開始值得坐定定睇。其實我估到個結局都係國王會贏，但估唔到佢會無仔送終，所以深入d睇，佢應該算係輸家至真，仔又死晒，老婆又唔再理佢，連最忠心既御醫都死埋，唔怪之得最後呢個國家會滅亡啦！

參考網址

終於完了

歷時一個月既考試終於係今日結束，多謝各位既支持，特別係可可，每當我溫書溫到最起勁既時候，佢仲係失驚無神咁撲上離，個口仲咬住一個玩具；每當我溫書溫到最悶既時候，佢一係就啤住我，一係就用佢果個仲大過佢個頭既臀部"得"住我。真係十分感激佢陪伴我渡過呢個咁漫長而艱苦既歲月。

媽媽生日快樂

今日係媽媽正日生日，在此向媽媽講聲：生日快樂！

我地今晚全家人去左時代廣場魚翅城食飯，為媽媽慶祝生日，其實價錢都唔平，不過聽聞呢度有著名既蛋散，大件夾好味，就試下啦！我地叫左幾碟小菜，再加一碟蛋散，部長話係一人一件既。最先上既係醉雞，d酒落得太多，搞到隻雞有少少苦味，麻麻地。跟住係抄蛋，唔知係咪自己偏愛食蛋呢，小妹覺得呢碟抄蛋係全晚最好味既，入口嫩滑唔黐牙，勁有蛋味，一個字：正！之後幾碟餸都唔錯，幾好味。最後係蛋散，食評真係無誇張，蛋散真係好大件，入口真係好鬆脆(入口即溶)，加上淋左d蜜糖係面，甜甜地，呢味甜品都好正！食飯前姐姐係煤氣公司買左個蛋糕，本來個蛋糕都幾好味，但係碟蛋散實在太出色，再加上我地又食得好飽，所以每人只象徵式地食左一小件。

第三科

今年考試都唔知搞乜，科科都唔夠時間做，往年既考試我一定早走ga，今日呢科唔單止做唔切，番到屋企仲發現計錯數，都話左考完就唔好再睇本書啦，家陣我都不知幾傷心。

倒霉媽媽

自從前年開始，每年既5月23日都可以話係我媽媽既倒霉日，點解咁講，故事要由2005年講起．．．

2005年5月23日星期一，下午4點幾，突然收到電話，係阿媽打離，以為佢放工後打離傾下閒計啦，點知佢一開口就話佢係醫院，嚇我一跳，佢話佢係公司跌親，入左A&E，我即刻同老細講要早走。去到醫院，佢仲等緊見醫生(分流之後有排等...)。原來佢係公司臨放工前，係server房做野時跌左落個窿，因為其中一塊地板揭起左，所以佢成個人跌左落去，整親條腰骨同隻腳，好彩照完X-ray無骨折，跟住就係屋企抖左一個禮拜。

2006年5月23日星期二，中午就到12點鐘lunch之前，突然又收到媽媽電話，初時我都唔醒起05年既意外，一開聲講野果個唔係阿媽，而係佢同事，佢同事話同我媽又入左醫院急症室，於是我又要同老細請假。又係去到呢間醫院，今次佢係公司條走廊跣倒，跌傷隻手，好彩只係輕傷，但係就令我地覺得好邪，因為又係5月23日。

2007年5月23日星期三，經過先兩年既教訓，媽媽今年決定呢日請假，連5月25日生日都唔請假，留番23號請，結果到左個日．．．一切都平安無事，好平靜咁渡過左呢一日。

Diner Dash

仲有成個幾禮拜先考下一科，近排又咁多新games出，呢隻仲要係我之前玩PC版已經勁鍾意既，無理由唔玩姐...

同Cake Mania差唔多玩法，都係賣野食，but比CM容易control得多，而且畫面又靚d，最重要係過關都難好多，無咁快爆機，挑戰性高好多。

新同事

一直懸空左好耐既位今日終於有新同事離上任，係個男同事，所以而家成個部門得我一個女仔。講番個新同事，佢勁高，家陣全個部門最高係佢。以我所知年頭2、3月個陣已經請左佢，不過轉會手續搞左好耐，差不多成三個月先過到離，真係等到頸都長，尤其係我老細，我諗佢等放假都等左好耐lu，hehe。Anyway，希望同呢位新同事合作愉快啦(好"行"，不過係我心聲)。

第二科

今日呢科考下晝，可以訓晏d(琴晚無通頂，因為太眼訓:P)，仲以為會精神d，點知飯氣攻心，更加眼訓zzz
我發覺我平時打字打得多，用筆寫字實在太少，所以今日寫字寫到手震，差d抽筋，上一科已經係咁，唔通真係要做番習字，練習下，寫下大字!？都唔明點解考電腦科唔用電腦作答。

完成第一科

今朝o岩o岩考完第一科，今年考足成個月，所以仲有漫漫長路要捱，慘～
今日考完試下晝仲要繼續番工捱世界，而家勁眼訓，慘慘～
今晚番屋企又要準備下星期個科，可能又要溫到三更半夜，慘慘慘～

人讀書我讀書，點解我讀得咁慘？

Cake Mania

哎呀！我又忍唔住手喇！上網見到有新貨，又d/l左離玩喇！不過又真係幾好玩，睇下個封面...

之前玩過PC版，覺得好好玩，不過NDSL版就令我有少少失望，因為唔駛一日已經爆左機，無乜特別隱藏版game，control又有d困難，好多時都篤唔中畫面既野，結論係：我又浪費左一日讀書時間喇！