匿名電話

下午三時，公司只得我一人，坐係度涼涼地，加上飯氣攻心，好想訓覺，就係我差d訓著既時候，突然有個電話打離，無來電顯示，即係街外打離既，拎起聽筒，係個女人離既，佢話佢自己係某病房既X經理(個間病房既經理真係姓X，咁我咪不以為然lor)，跟住佢話病房部電腦壞左，咁o岩有個病人o岩o岩入離就暈左，要急住聯絡佢屋企人咁話喎，佢話俾個病人身分證我幫佢check下屋企人聯絡電話和地址，我開始覺得有d奇怪，暈左就緊係搵醫生啦，點會搵家屬呢!?咁我緊係無幫佢check啦，叫佢留低個電話再聯絡佢，佢唔肯喎，講講下突然我兩位上司走左離我個位喎，佢地見到無來電顯示，即刻耍手著我收線，收線後先知原來佢地都o岩o岩分別收到兩個街外電話，內容都係差唔多，又係叫佢地check病人資料，我地咪報俾保安跟進lor，件事真係好奇怪，點解果個人知道人地個身分證，但又唔知道人地個電話呢？我其中一位上司估可能係財務公司追數，但個債仔換左電話地址，佢地剩係有佢身分證，所以打離博一博，睇下check唔check到d資料，呢個講法好似最合情合理，我差d就中招，如果真係透露左d資料出離，唔止炒魷咁簡單，犯刑事ga，真係超險！

可可受傷了

今日放工後同可可去睇醫生，臨放工前媽咪好緊張咁打離話可可流到一地都係血，嚇得我即刻叫佢搵塊布包住佢隻腳先，等姐姐放工番屋企後再同佢急救，之後去診所同我會合，去到診所，醫生一見到佢隻腳，就話要剷左d毛睇清楚d(因為可可成個月無剪毛喇)，護士負責抱住同o禁實佢，睇清楚原來腳踭度生左粒瘡，粒瘡爆左所以流血，跟住醫生同佢消毒、唧癃、止血同包紮，可可痛到流眼淚又嗚嗚叫呀，醫生好大力咁唧，搞到佢自己雙手沾滿血，仲滴到地下周圍都係血，可可當然痛到好大聲咁呱呱叫兼不停掙扎，嚇到隔離房位醫生走埋入離睇下咩事，搞到我地好似係度劏狗咁，不過可可應該真係超級痛，因為我從未聽過佢叫得咁淒涼，醫生配左支消毒藥水俾我地番屋企自己同佢每日消毒隻腳，仲話有癃既話一定要唧左佢，嘩！我地真係唔敢同佢唧癃呀，好恐怖o架，整痛佢之餘又驚會整到一地都係血，最後醫生將可可隻腳仔包紮好，護士姐姐就講笑話隻粉紅腳仔好靚靚喎，可可當然笑唔出啦，只係想快d走，離開呢個鬼地方乍！

可可隻腳包成咁．．．


近d睇．．．


正所謂禍不單行，咁o岩又發現可可隻眼紅晒，佢以前都試過喇，咪順便叫醫生睇埋lor，醫生就配左支眼藥水俾佢，由於驚佢會捽眼，又怕佢會咬隻粉紅襪仔，所以要戴番個大喇叭，可可勁唔開心呀！

又是一個人

今晚又係一個人食飯，食完飯匆匆番到屋企，可可已經發晒脾四，掉左個玩具落碗飯度唔食，直到全家人番晒離，佢行來行去玩既時候，先發覺佢隻右腳震晒，行路訖下訖下咁，掂佢隻腳仲呱呱叫添，咁全家人一齊睇真d佢隻腳仔啦，發現腳踭位紅左腫左，唔知係發炎、生瘡、定係損左，所以佢盡量唔用果隻腳行路，係正常地板又坐唔到，番入九龍先坐到，好驚呀，聽日帶佢去睇醫生，希望無事啦！

春茗

今晚公司搞春茗，係倫敦酒樓延開42席，我唔駛俾錢都有份去，去做工作人員，本來應該只係負責電腦個part，事關HR話俾左三百蚊酒樓，酒樓方面話會派一位專業人員負責場地音響，誰不知到頭來都係由我地搞晒，包括播酒樓卡拉OK歌(歌曲由酒樓既卡拉OK機提供，但唔知點解要我地負責播)，播PPT，播VCD&DVD，教咪聲等等，那位專業人員反而俾ADMIN同事話佢阻住出入！
本來我地都有個位坐埋枱食野，當我地忙完負責個part，想埋位食野時，發現侍應已經收左我地既碗筷，執走左個位，呢度d侍應未免太高服務效率喇！最後我地剩係食左隻紅藍雞蛋，點解紅雞蛋會有藍色？因為有人用藍筆係隻雞蛋上面寫左公司幾多周年既數目字，仲好聰明咁係烚之前寫既，咁烚完隻紅雞蛋，剝左殼之後，除左紅色之外，咪有一部份係染左藍色lor，由於我太肚餓，唔理佢係咩色，成舊吞左落肚lu！